====== Kvindeka vintro ======

^Teksto\\ Muziko|[[Mikaelo BRONSxTEJN]]|
1999
===== Teksto =====
Pasis matenoj drolaj
kun la vekigxa fresx’.
Trans la fenestr’ piroloj
pomas en griza negx’.
Negxa nubar’ tagmeza
dauxras en venta flu’,
kaj la pensado peza
naskas nenion plu

krom la mokantaj rimoj.
Venu do vi, viktimoj –
cxiam nun por regalo
pretas ofenda galo.
Mia kvindeka vintro...

Min, jam vivantan super
meza poeta agx’,
mergas en fastan supon
duboj kaj malkuragx’,
kaj por pasigi nokton 
en cxiovora am’
la posedatan dokton 
mi ne oferus jam.

For de l’ strecxitaj kordoj
prenis amikojn sortoj,
tamen la mia vanta
lasis min plu vivanta.
Mia kvindeka vintro...

Voston pistole teni
min instruadis sort’.
Cxion forprenas de ni
la senkompata mort’.
Do, se l’ fortun’ favoros
per la netruda help’, –
ree konvaloj floros
en la printempa hel’,

ree odoros pinoj, 
ree incitos inoj,
ree por gxua frando
tentos animon brando.
Mia kvindeka vintro...

Mia kvindeka vintro –
pasis la vivkulmin’.
Mia kvindeka vintro,
mi ne malamas vin.
Eble modera virto
venos en maja klar’...
Mia kvindeka vintro
pasxas laux kalendar’.

Estu, do, mi trovinta
vojon en negxo vintra
preter la plendoj vanaj
pri panoj kaj malsanoj...
Mia kvindeka vintro...

Mia amiko juna,
mi ne jxaluzas, ne.
Helpos dum ir’ komuna
vin mia nuna negx’.
Iom senbrida ardo
cedos al la raci’,
kaj, spite al singardo,
foje ekriskos mi.

Penu momentojn sxpari,
penu pli multon fari,
cxar kun rapid’ avia 
venos ankaux la via –
via kvindeka vintro...

{{tag>kanto litero_k esperanto barda}}