====== La Soldato Kiu Marsxas ======
^Teksto|[[http://esperanto.net/literaturo/roman/piron.html|Claude PIRON]]|
^Muziko|[[Nanne KALMA]]|
^Plenumas|[[Kajto]]|

===== Teksto =====
La soldato kiu marsxas
en la vento
en silento
sur la vojo kiu marcxas
sian korpon ne plu sentas.
 
Lia menso fakte brutas
nur la laco
kaj l' agaco
de la pluvo kiu gutas
senkompate lin turmentas.
 
Kaj li iras plu malbene
pri la koto
sur la boto
kiu cxiam pezas gxene
kaj la vojon malglatigas.
 
Dum sufere monopole
la kadenco
en la menso
regas cxion malbonvole
kaj la povon pensi ligas.
 
Kaj li marsxas en la vico
uniforma
unuforma
sur vetera la malico
kaj la moko de la sergxent'.
 
Li delonge jam maldormas
kaj oscedo
kun obsedo
en makzelo mem sin formas
pro nerezistebla tent'.
 
Se li povus ecx almoze
ekricevi
rajton revi
kaj minuton nur ripoze
halti sur la voja bord'.

Sed li tion ne esperas
cxar la revo
pro la devo
en soldato ne aperas:
jen la militserva sort'.
 
Jam tro pezas la pafilo
kaj la kasko
kaj la sako
kaj la kacxo el argxilo
gluigxinta cxe la sxu'.
 
Sed la fora horizonto
plej perfide
malrapide
maleblige al renkonto
cxiam foren fugxas plu.
 
La soldato kiu laca
dauxre iras
li sopiras
al ripoza vivo paca
sen cxiama plua pel'.
 
Sed li sentas kun eknauxzo
ke la vivo
en aktivo
dauxras ade kaj sen pauxzo
gxis neatingebla cel'.
 
Kaj samkiel en armeo
la rezono
pri ordono
ne ekzistas pro obeo
kun neeblo de escept'.
 
Tiel mankas la kompreno
pri la motivo
de la vivo
kaj nur regas cxi sinteno:
plua iro kaj akcept'.
{{tag>litero_s kanto}}