====== Mia Nomo Ne Gravas ======
//Auxtoras kaj kantas [[Mikaelo BRONSxTEJN]], 1972//

===== Teksto =====
Mia nomo ne gravas,
mia agxo - des pli.
Nur modestan kanteton
mi prezentos al vi.
Malaperas amikoj
en haladzo de l'viv' -
Nur pri tio bedauxras
mia simpla motiv'. 

Estis iam aktiva
unu mia amik'...
Lia ventromelono
kreskas nun kun efik'.
Li adoras tagmangxon,
vespermangxon - des pli!
Matenmangxo abunda
estas sankta por li.

Li ecx aspirantigxis 
sxajnas, ke pro malsat', -
Cxar pli bonan tagmangxon
havos la kandidat'.
Lia cxefo ordonis 
kun mirinda rigor':
"Malbenitan lingvacxon 
vi forjxetu el l'kor'!"

"Iru for, Esperanto!..." - 
li ekploris kun trist'.-
"Povas nun nur doktoro 
resti esperantist'....
Kiam mi doktorigxos, 
mi forkuros el hejm'!"
... Pacience atendu 
la doktoron, ho SEJM!

En tendaroj aperis 
simpatia frauxlin'.
Cxiu dua junulo 
en anim' amis sxin!
Sxiaj bluaj okuloj 
estis vera turkis'.
Pro agemo kaj belo 
ni elektis sxin Miss. 

Tamen, pasis la tagoj - 
post gepatra admon'
sxi akceptis proponon 
de la certa person',
kiu dum rendevuoj 
babiladis kun flat':
"Mia amo - Beethoven 
kaj... moderna kravat'."

Iam lernis germanan 
li en la institut',
kaj memoras ke "bone",
sxajne, estas "zer gut".
Tio certe suficxas 
en la certa medi'.
... Plu knabin' ne aperas 
en tendaroj kun ni. 

Dauxri kanto simila,
certe, povus sen fin'.
Sed, "cxu estos moralo?" - 
tuj demandos vi min.
La moralo aperos - 
mi ne miras pri l'pet' -
Ni kutimis ricevi 
sencon sur teleret'. 

Ni kutimis pardoni, 
se amik' sen hezit'
Oferadas la sentojn 
por trankvil' kaj profit'...
Malaperas amikoj 
en haladzo de l'viv' -
Nur pri tio bedauxaras 
mia simpla motiv'...
{{tag>litero_m kanto}}