====== Oksikoko ======

^Teksto\\ Muziko|[[Mikaelo BRONSxTEJN]]|
1980
===== Teksto =====

Ree nin post someraj vantoj
trankviligas la trist’ auxtuna,
ree en oksikokaj vangoj
respegulas sin oro suna.
Estis multaj ideoj belaj
dum tendara diskut’ auxdaca,
kaj la lando de verdaj steloj
nun solvigxis en vivo paca.

En la mond’ akurata
cxiu havas la lokon:
segxon la advokato, 
tekon la diplomato,
amon – cxiu amato,
havas mi oksikokon!

Revoj, revoj, vi – sapvezikoj,
kreve krakas en vivo kruda...
Ofte inter la kapoj brikaj
cedas ni al la ver’ apuda.
Tiu fugxis disrevigxinta,
tiu mortis pro koratako,
tiu ion atingis pro la
cxiopova “haroza brako”.

Ne al pompa jubeo
pregxas povra ermito.
Jes, ni strebas al kreo,
sed la vica ideo
vane staras kun veo
antaux pordo fermita.

Mi en marcxoj trankvilon sercxas,
oksikoko – la amo mia,
post senvenkaj bataloj, certe,
savas min gxia sorcx’ magia.
Se dum la rikoltado sxvita
mi alvokon aux mokon auxdas, –
tenas min la afer’ profita, –
ne kverelas mi, ne aplauxdas.

Vi komprenu, amiko,
mi ja auxdas la vokon, –
sed afero komplika –
opinio publika,
kaj mi estas laika, –
havas mi oksikokon.
{{tag>kanto litero_o esperanto barda}}