====== Adiaŭa kanto ======

^Teksto|[[Mikaelo POVORIN]]|
^Muziko|[[Mikaelo POVORIN]]|

La tempo estas sen kompat', vi scias bone: 
Jen saga flug', jen rampo de helik'. 
Disigas ĝi, sed ni rigardu ĝin pardone, 
Ja same ĝi kunigas nin, amik'. 

//Refreno://
>Ne ploru, kara, 
>Foriru la angor' 
>En tiu lasta hor'. 
>Laŭ son' gitara 
>Kunkantu nun en ĥor' 
>Soprano kaj tenor' 
>Pri am' senŝpara. 

La ŝminko sur knabinaj lipoj dolĉe gustas, 
Kaj sale gustas varma larm' sur vang'. 
"Memoru tiujn lastajn kisojn", koro flustras, 
Kaj pulsas ĝi je adiaŭa tang'. 

//Refreno//

Jen tempas jam, do, ĝis revid', mi devas iri, 
Ĉar finon havas ĉiu bela kant'. 
Nur simplajn vortojn por konsol' mi volas diri, 
Komprenos kaj spertul', kaj komencant': 

//Refreno//

===== Ligoj =====

* http://mpovorin.narod.ru 
* http://www.musicexpress.com.br/povorin_eo 
* http://www.myspace.com/povorin
* http://www.ipernity.com/doc/mikaelo.povorin

{{tag>kanto litero_a}}