====== Rabista Dormo ======
^Teksto|W. Auld kaj [[Nanne KALMA]]|
^Kantas|[[Kajto]]|

===== Teksto =====

Ha dormo, kiu al mi rabas
minutojn de la viv',
sur mia koramboso frapas
martelo de malammotiv',
cxar miaj tagoj estas jam mallongaj
sen ankaux tio,
ke vi min lasas sen konscio
al porka stagno, al stuporoj ronkaj.

Mi, mi volas koni
cxiun momenton de etern'.
Mi, mi volas spioni
plej etan spasmon de la homoverm',
penetri en komprenon gxis la fundo,
kaj legi de l' epokoj cxiun pagxon,
ne perdi mian junulagxon
marasme kvazaux apudfajra hundo.

Esti poet' en mi sopiro ardas:
mi volas krei ja generi belon!
Sed ve, ho ve, mi nur rigardas,
ne vidas, ne traboras sxelon,
gxis la kerno, gxis la kerno.
Mi scias, ke por poetigxi
mi devas min dedicxi 
al vivopleno da senfina lerno.

Tial, ho dorm' kruela, mi domagxas
vian neforskueblan jugon.
Vin nur devige mi omagxas,
klinas, klinas la nukon,
cxar plongxas mia kap' al la kuseno,
kaj miaj okuloj krevas,
valorajn horojn mi nevole devas
pasigi en senfrukta sveno,
pasigi en senfrukta sveno,
pasigi en senfrukta sveno.

{{tag>litero_r kanto esperanto}}