Muziko | Karl Knopf |
---|---|
Esperanta teksto | Johanna Zschepank |
Tipo | nova teksto |
Ho, naturo, freŝa, verda.
Mi vin amas en maten',
kiam blank-nebulo kuŝas
sur floreto, pin', fraksen’ —
kiam rivereto dolĉe
rakontadas per plaŭdad',
kaj alaŭdo ĝoje trilas,
sonas merla amkantad'.
Ho, naturo, granda, vasta.
Mi vin amas dum la tag',
kiam suno varme brilas
tra la foliar' de l’ fag', —
abeletoj bru-zumante
sukon serĉas en la flor',
Tiam, ho naturo bela,
trankviliĝas mia kor'.
Ho, naturo pacoplena.
Mi vin amas je l’ vesper'.
Ĉio jam ĉirkaŭe dormas.
Susurado en aer'!
Luno en arĝenta brilo
staras sur la firmament’.
Mil steletoj klare lumas:
Sankta pac'! Ĉiela sent'.