Freŝa vento, freŝa vivo

MuzikoE. Windeballe
Esperanta tekstoTeo Jung
Tiponova teksto

Freŝa vento, freŝa vivo
blovas de la altmontar'
kaj en gaja ofensivo
pelas polvon el arkivo,
puŝas al agema far'.

Vigla blovo, verva movo
tuŝas niajn vicojn nun:
For metodoj de l’ malnovo,
sur aktar' senpova kovo!
Ek! Renkonte al la Sun'!

Kiu volas mond-akiri,
estu preta por batal'.
Ne utilas nur sopiri,
sed kuraĝe pioniri,
lukti por la ideal'!

Belaj estas sapvezikoj
de la revo kaj imag',
belaj ankaŭ statistikoj
kaj ekzaktaj la rubrikoj;
tamen venkas nur la ag'.

Do, antaŭen, karaj fratoj,
en batalon kun defi'!
Ne timigu vin la batoj —
vi rebatu! Ja soldatoj
de l’ Ideo estu vi!

Tra batalo kaj laboro
lumradias la Estont'.
Venos horo, brilos gloro,
regos ĝoj', jubilos koro:
Nia estos jam la Mond'!

  • fresxa_vento_fresxa_vivo.txt
  • Lastaj ŝanĝoj: 04.11.2015 14:01
  • (ekstera redakto)