Kiu estas homa nul'?
Kiu serĉas vantan gloron,
Aŭ tro alta taksas oron,
Aŭ nur konas sklavlaboron, —
/: Tiu estas homa nul'. :/

Kiu vivas kiel best'?
Ĉiu, kies sola fako
Estas pensi pri stomako,
Pri seksaĵoj aŭ konjako, —
/: Tiu vivas kiel best'. :/

Kiu estas homtrompul'?
Kiu montras al ĉielo
Sed zorgante pri mielo
— La surtera — en barelo,
/: Tiu estas homtrompul'. :/

Kiu estas malamik'?
Kiu por si mem bonstatas
Dum alia hom' malsatas,
Kiu homojn ekspluatas, —
/: Tiu estas malamik'. :/